លោក John Paul DeJoria លាតត្រដាងពីទម្លាប់សាមញ្ញៗដែលបានធ្វើឲ្យលោកក្លាយជាមហាសេដ្ឋីហួសពីការស្មាន
ក្នុងនាមជាសហគ្រិនជោគជ័យមួយរូប នៅពេលនេះលោកមានទស្សនមួយចំនួនសម្រាប់ចែករំលែកដល់ប្រិយមិត្តស្វែងយល់ជាពិសេសសម្រាប់សហគ្រិនទូទៅតែម្តងពីអ្វីដែលលោកយល់ឃើញក្នុងជីវិតការងារប្រចាំថ្ងៃរបស់លោក។
«ខ្ញុំជាមនុស្សដែលចូលចិត្តក្រោកពីគេងនៅព្រឹកព្រលឹម»។ នេះជាប្រសាសន៍ដំបូងរបស់មហាសេដ្ឋីមកពីរដ្ឋ California រូបនេះ។ លោកបានបន្តថា៖« ខ្ញុំមិនខ្វល់ថា ខ្ញុំនៅកន្លែងណា នៅផ្ទះអ្នកណា ឬ ទៅគេងនៅកន្លែងណានោះទេ ខ្ញុំតែក្រោកពីគេង ហើយអង្គុយលើគ្រែប្រមាណ ៥ នាទីទើបងើបដើរចេញ ហើយខ្ញុំក៏មិនអាចប្រាប់បានដែរថា ការធ្វើបែបនេះមានប្រយោជន៍អ្វីនោះដែរ»។
លោកបានចាត់ទុកខ្លួនលោកជាមនុស្សសាមញ្ញដូច្នេះថា៖« ខ្ញុំមិនបានគិតលើគម្រោងរបស់ខ្ញុំថា ត្រូវធ្វើអី មើលរបៀបវារៈការងារ ឬ លើកទូរស័ព្ទអីនោះទេនៅពេលក្រោកពីគេងភ្លាមៗ។ រឿងដ៏សាមញ្ញនោះគឺថា ខ្ញុំគ្រាន់តែបើកភ្នែក និង ធ្វើការងារដែលខ្ញុំកំពុងធ្វើឲ្យបានរួចរាល់ដាច់ស្រេចភ្លាមៗតែម្តង»។
«ក្រោកពីគេងភ្លាមៗ ខ្ញុំមិនចាប់អារម្មណ៍ ឬ យកត្រចៀកស្តាប់សម្តីអ្នកណាភ្លាមៗនោះដែរ។ ខ្ញុំគ្រាន់តែងួតទឹកឲ្យស្អាត ទទួលទានអាហារពេលព្រឹក និង កាហ្វេមួយកែវ គឺអាចធ្វើឲ្យជីវិតរបស់ខ្ញុំនៅព្រឹកព្រលឹមមានភាពរីករាយ។ បន្ទាប់មកខ្ញុំក៏ចាប់ផ្តើមគិតពីអ្វីដែលធ្វើឲ្យជីវិតរបស់ខ្ញុំកាន់តែល្អប្រសើរ និង ចង់ឃើញក្រុមគ្រួសាររបស់ខ្ញុំរស់នៅយ៉ាងសុខស្រួលជានិច្ច»។ នេះជាការលើកឡើងរបស់មហាសេដ្ឋី John Paul DeJoria។
លោកបានផ្ដល់ដំបូន្មានទៀតថា៖« ខ្ញុំជាមនុស្សដែលស្រលាញ់នូវអ្វីដែលខ្ញុត្រូវធ្វើ ធ្វើអ្វីសម្រាប់មនុស្សដែលខ្ញុំស្រលាញ់ និង ជាមួយមនុស្សដែលធ្វើការជាមួយខ្ញុំ។ វាពិតជាមានសារសំខាន់ណាស់ដែលថា ថាមពលរបស់ខ្ញុំកាន់តែខ្លាំងឡើងនៅពេលដែលខ្ញុំបានធ្វើការជាមួយក្រុមការងាររបស់ខ្ញុំ។ អ្នកត្រូវមានមហិច្ឆតាឲ្យធំបន្តិច»។
បន្ទាប់មកក្រោយពីបានស្រស់ស្រូបអាហារពេលព្រឹករួចហើយ លោកចាប់ផ្តើមគិតគូរពីការងាររបស់លោក ថាតើលោកត្រូវធ្វើអ្វីខ្លះ? នេះតម្រូវឲ្យលោកហៅទូរស័ព្ទទៅកាន់ក្រុមការងារ ឬ អ្នកគ្រប់គ្រងក្រុមហ៊ុនរបស់លោកនៅពេលម៉ោងធ្វើការចូលមកដល់ និង ឆ្លើយតបទៅនឹងបញ្ហាបន្ទាន់ណាមួយ ជាពិសេសនោះ គឺកត់ត្រាចំណុចសំខាន់ៗដែលលោកត្រូវធ្វើ។
រឿងដ៏គួរឲ្យភ្ញាក់ផ្អើលមួយទៀតនោះគឺថា លោក John បានសារភាពថា លោកមិនដែលប្រើអ៊ីមែលម្តងណា និង គ្មានផ្លូវប្រើវានោះឡើយនៅពេលអនាគត។ ប្រសិនបើលោកចង់ទំនាក់ទំនងអ្នកណាម្នាក់ ឬ ក្រុមការងាររបស់លោក លោកនឹងប្រើប្រាស់ទូរស័ព្ទភ្លាម។
ទន្ទឹមនឹងនេះ លោកក៏បានបង្ហាញពីយុទ្ធសាស្ត្រធ្វើឲ្យការងារមានប្រសិទ្ធភាព និង គ្រប់គ្រងពេលវេលាផងដែរដោយបានលើកឡើងដូច្នេះថា៖« ដើម្បីផ្ទេរការងារប្រកបដោយប្រសិទ្ធភាព និង មិនខ្ជះខ្ជាយពេលវេលា អ្នកត្រូវប្រាកដថា អ្នកមានក្រុមការងារដ៏រឹងមាំមួយដែលអាចធ្វើបានច្រើនជាងធម្មតា។ ថ្ងៃនេះមិនដូចថ្ងៃម្សិលមិញនោះទេ ហេតុដូច្នេះហើយ ការក្រោកពីគេងនៅព្រឹកព្រលឹម និង ធ្វើការងារដោយស្វាហាប់ចប់ចុងចប់ដើម លទ្ធផលនឹងហួសពីការរំពឹងទុក។
ពាក្យមួយឃ្លារបស់លោកចុងក្រោយរបស់មហាសេដ្ឋី John ដែលប្រិយមិត្តគួរពិចារណានៅពេលនេះគឺថា “បុគ្គលជោគជ័យធ្វើអ្វីៗគ្រប់បែបយ៉ាងដែលបុគ្គលបរាជ័យមិនចង់ធ្វើ”។
លោកនិយាយថា៖« ខ្ញុំមានពេលវេលា ២៤ ក្នុងមួយថ្ងៃដូចមនុស្សគ្រប់គ្នាដែរ ហើយខ្ញុំសូមផ្តាំថា ខ្ញុំជាមនុស្សស្រលាញ់អ្វីដែលខ្ញុំចង់ធ្វើស្ទើរពេញមួយឆាកជីវិតរបស់ខ្ញុំ។ នេះជាទម្លាប់របស់ខ្ញុំ ហើយវាពិតជាល្អសម្រាប់ខ្ញុំ»។
No comments: