មហាសេដ្ឋី Warren Buffett៖ ត្រូវវិនិយោគលើ ៦ ចំណុចនេះឲ្យបានច្រើនបំផុត ទើបជោគជ័យក្នុងជីវិត!

លោក វ៉ារេន ប៊ូហ្វេត (Warren Buffett) ត្រូវបានគេស្គាល់យ៉ាងច្បាស់ថា ជាមហាសេដ្ឋីដ៏ល្បីល្បាញនៅលើពិភពលោក។ បច្ចុប្បន្ននេះ លោកមានទ្រព្យសម្បត្តិសរុបប្រមាណ ៧២ពាន់លានដុល្លារអាមេរិក។ អ្នកណាក៏ទទួលស្គាល់ដែរថា មហាសេដ្ឋីរូបនេះមានជំនាញខាងផ្នែកវិនិយោគលើវិស័យផ្សេងៗ ហើយតែងទទួលជោគជ័យជាបន្តបន្ទាប់។

នៅពេលនេះ លោកបានចែករំលែកចំណេះដឹងរបស់លោក អំពីយុទ្ធសាស្ត្រដ៏សំខាន់ ក្នុងការវិនិយោគ ដើម្បីទទួលបានភាពជោគជ័យក្នុងជីវិត។ ខាងក្រោមនេះ គឺជាចំណុចសំខាន់ៗ ដែលលោកអ្នកត្រូវវិនិយោគឲ្យបានច្រើនបំផុតក្នុងជីវិត តាមតែអាចធ្វើទៅបាន៖

១) ធ្វើឲ្យសតិ រាងកាយ និង ស្មារតីមានសុខភាពល្អ

បើតាមលោក វ៉ារេន ប៊ូហ្វេត(Warren Buffett) បញ្ជាក់ថា ធាតុទាំង៣នេះ គឺពិតជាសំខាន់ខ្លាំងណាស់សម្រាប់មនុស្សទូទៅ ដូច្នេះហើយពួកគេត្រូវតែវិនិយោគឲ្យបានច្រើនបំផុត។ វាមិនមែនជាការលំបាកខ្លាំងនោះឡើយ ពោលគឺគ្រប់គ្នាអាចធ្វើបាន។

ទី១ សតិ៖ 

ត្រូវអានសៀវភៅ កាសែត និង ឯកសារផ្សេងៗជាប្រចាំ ដើម្បីឲ្យអ្នកមានយល់ដឹងអំពីរឿងរ៉ាវជាច្រើនដែលបានកើតឡើង ព្រោះវាអាចជួយអ្នកឲ្យមានលទ្ធភាពឆ្លើយតបទៅនឹងស្ថានការណ៍ជាក់ស្តែង។

ទី២ រាងកាយ៖

កុំមានភាពខ្ជិលច្រអូសឲ្យសោះ ក្នុងការហាត់ប្រាណ ដើម្បីឲ្យរាងកាយរបស់អ្នកមានភាពរឹងមាំ និង សុខភាពល្អ។ អ្នកមិនអាចមានលទ្ធភាព ធ្វើការងារអស្ចារ្យអ្វីបានឡើយ ប្រសិនបើរាងកាយមានភាពទន់ខ្សោយ។

ទី៣ ស្មារតី៖

ស្មារតីពិតជាមានសារៈសំខាន់ខ្លាំងណាស់ សម្រាប់គ្រប់គ្នា ព្រោះបើអន់ផ្នែកស្មារតី មានន័យថា អ្នកមិនហ៊ានធ្វើអ្វី ឬ ប្រឈមនឹងបញ្ហាដែលកំពុងកើតឡើងបាននោះទេ។ ដូច្នេះហើយ ដើម្បីពង្រឹងស្មារតីឲ្យល្អ អ្នកគួរតែព្យាយាមបួងសួង គិតរឿងល្អៗ ឬ អគុណទៅដល់នរណាម្នាក់ ដែលអាចផ្តល់កម្លាំងចិត្តធំធេង (បើទោះបីជាស្ថិតក្នុងសាសនាណាក៏ដោយ)។ ការធ្វើបែបនេះ ពិតជាអាចជួយកាត់បន្ថយភាពភ័យខ្លាច និង ធ្វើឲ្យអារម្មណ៍ស្ងប់ល្អ។

២) អភិវឌ្ឍទម្លាប់វិជ្ជមានប្រចាំថ្ងៃ

សកម្មភាពរបស់មនុស្ស គឺកើតចេញពីការគិត។ បើគិតវិជ្ជមាន សកម្មភាពប្រាកដជាមានភាពវិជ្ជមាន តែបើគិតអវិជ្ជមាន ប្រាកដជាមានសកម្មភាពអវិជ្ជមានដែរហើយ ។ដូច្នេះ អ្នកត្រូវព្យាយាមបង្កើត និង ពង្រីករាល់ទម្លាប់វិជ្ជមានទាំងអស់ ដើម្បីឲ្យអ្នកអាចទទួលបានលទ្ធផលជាវិជ្ជមានធំធេងនៅពេលអនាគត។ វាជាចំណុចដ៏សំខាន់មួយ ដែលលោក វ៉ារេន ប៊ូហ្វេត(Warren Buffett) ណែនាំឲ្យវិនិយោគជាដាច់ខាត ព្រោះ វាពិតជាមានប្រយោជន៍យ៉ាងខ្លាំងសម្រាប់ជីវិត។

៣) បន្តការរៀនសូត្រ

ការរៀនសូត្រ គឺគ្មានថ្ងៃចប់នោះទេ បើទោះបីជារៀនចប់ថ្នាក់បណ្ឌិតក៏ដោយ។ មានន័យថា អ្នកត្រូវតែវិនិយោគទន់ឲ្យបានច្រើនលើការរៀនសូត្រ ទោះបីជាស្ថិតក្នុងវ័យណា និង ពេលវេលាណាក៏ដោយ ពោលគឺត្រូវព្យាយាមធ្វើវាឲ្យបានច្រើន តាមលទ្ធភាពដែលអាចទៅរួច។ គ្មាននរណាម្នាក់ អាចជោគជ័យក្នុងពិភពលោកពោរពេញដោយការប្រកួតប្រជែង ដោយគ្មានចំណេះដឹងនោះឡើយ។

៤) ព្យាយាមបង្កើតទំនាក់ទំនងជាមួយបុគ្គលជោគជ័យ

ដើម្បីងាយស្រួល ក្នុងការស្វែងរកផ្លូវទៅកាន់ជោគជ័យក្នុងជីវិត អ្នកត្រូវតែសិក្សា និង ស្វែងយល់អំពី បទពិសោធន៍ និង យុទ្ធសាស្ត្រផ្សេងៗដែលមនុស្សជោគជ័យបានហែលឆ្លង។ ដូច្នេះហើយ អ្នកគួរតែព្យាយាមបង្កើតទំនាក់ទំនងជាមួយមនុស្ស ទាំងនោះឲ្យបានច្រើន តាមលទ្ធភាពដែលអាចធ្វើទៅបាន ព្រោះវាពិតជាសំខាន់ខ្លាំងណាស់។

៥) ចំណាយពេលដើម្បីស្គាល់ថា ខ្លួនជានរណា

មានមនុស្សមិនតិចនោះទេ ដែលព្យាយាមស្គាល់ និង យល់ពីអ្នកដទៃ ប៉ុន្តែពេលពួកគេមិនស្គាល់ច្បាស់ថា ខ្លួនឯងជានរណានោះទេ។ ប្រសិនបើ សូម្បីតែខ្លួនឯង អ្នកមិនទាន់ស្គាល់ច្បាស់ផង វាពិតជាមានការលំបាកខ្លាំងណាស់ ដើម្បីទទួលបានជោគជ័យក្នុងជីវិត។ ការស្គាល់ច្បាស់អំពីខ្លួនឯង មានន័យថាយល់ថា អ្វីដែលខ្លួនខ្លាំង និង ខ្សោយ។ ដូច្នេះហើយ ត្រូវព្យាយាមចំណាយពេលវេលាឲ្យបានច្រើន ដើម្បីស្វែងយល់អំពីខ្លួនឯង។

៦) ធ្វើអ្វីដែលខ្លួនពេញចិត្ត

ឆាកជីវិតរបស់មនុស្ស គឺខ្លីណាស់ ដូច្នេះហើយអ្នកគួរតែព្យាយាមធ្វើអ្វីដែល ខ្លួនពេញចិត្ត។ វាជាចំណុចដ៏សំខាន់មួយដែល ជួយឲ្យអ្នកអាចរស់នៅក្នុងជីវិតមួយប្រកបដោយ ស្នាមញញឹម និង ជោគជ័យ។ កាលណាអ្នកធ្វើអ្វីដែល ខ្លួនមិនពេញចិត្ត នោះអ្នកនឹងរស់នៅជាមួយនឹងភាពធុញទ្រាន់ និង អស់សង្ឃឹម។ ដូច្នេះ គួរធ្វើអ្វីដែលអ្នកពេញចិត្ត ហើយទាំងនេះគឺជាអ្វីដែលលោក Warren Buffett បានអនុវត្តកន្លងមក។

ប្រែសម្រួល៖ រស្មី Thebnew

ប្រភព៖ www.inc.com

Slide show