ហេតុផល ៦យ៉ាងនេះ អាចធ្វើឲ្យលោកអ្នកប្ដូរចិត្តឈប់ចង់ប្រើ Facebook តទៅទៀត
រយៈពេលប្រហែល ១០ឆ្នាំមកហើយដែល Facebook បានចូលខ្លួនបម្រើដល់សាធារណជនក្នុងការភ្ជាប់ទំនាក់ទំនងរវាងមនុស្សបានងាយស្រួល មិនថាជិតឬឆ្ងាយនោះទេ។ នេះគឺជាសមិទ្ធផលដ៏អស្ចារ្យរបស់ម្ចាស់ក្រុមហ៊ុន Facebook លោក Mark Zuckerberg ជាមួយមិត្តរួមថ្នាក់របស់លោកប៉ុន្មាននាក់។
បណ្ដាញសង្គមដែលកំពុងមានអ្នកប្រើប្រមាណ ១,៣៩ពាន់លានគណនី (គិតត្រឹមដើមឆ្នាំ២០១៥) នេះ ពិតជាផ្ដល់អត្ថប្រយោជន៍យ៉ាងច្រើនដល់អ្នកប្រើយ៉ាងងាយស្រួលក្នុងការភ្ជាប់ទំនាក់ទំនងគ្នាបានឆាប់រហ័ស។
យ៉ាងណាក៏ដោយ ទន្ទឹមនឹងគុណសម្បត្តិ Facebook ក៏អាចផ្ដល់គុណវិបត្តិខ្លះដល់លោកអ្នកផងដែរ ក្នុងករណីដែលអ្នកមិនបានប្រើឱ្យស័ក្ដិសមកាលៈទេសៈ ដែលត្រូវប្រើ។ ខាងក្រោមនេះគឺជាហេតុផល ៧យ៉ាង ដែលលោកអ្នកអាចយកមកឆ្លុះបញ្ចាំងពីខ្លួនអ្នកថា តើអ្នកកំពុងផ្ដេកផ្ដួលលើចំណុចណាខ្លះ ហើយតើត្រូវកែទម្លាប់ដោយរបៀបណា ឬមួយក៏ឈប់ប្រើ Facebook តទៅទៀត៖
១) ចំណាយពេលច្រើនទៅលើ Facebook នាំឲ្យខាតពេលឥតប្រយោជន៍
យោងតាមការស្រាវជ្រាវទៅលើអត្រាប្រើប្រាស់ Facebook ជាមធ្យមឃើញថា ក្នុងមួយថ្ងៃៗមនុស្សបានចំណាយពេល ១៧នាទីនៅលើបណ្ដាញសង្គមមួយនេះ។ នេះអាចចាត់ទុកជារយៈពេលមួយសមរម្យចំពោះការប្រើប្រាស់ Facebook។ ប៉ុន្តែ យោងតាមទិដ្ឋភាពជាក់ស្តែង អ្នកប្រើ Facebook មួយចំនួនធំនាពេលបច្ចុប្បន្នបានចំណាយពេលលើ Facebook កាន់តែច្រើនឡើងៗ មិនថាពេលវេលាផ្ទាល់ខ្លួន ឬពេលវេលាសិក្សា ការងារ ញុំាអាហារ និងសូម្បីតែពេលគេងថែមទៀត។
នេះអាចជះឥទ្ធិពលដល់ទំនាក់ទំនងក្នុងសង្គមពិតទៅវិញ ម្យ៉ាងពេលខ្លះក៏អាចធ្វើឲ្យលោកអ្នកមានអារម្មណ៍ធុនទ្រាន់ទៅវិញក៏ថាបាន ហើយផលអវិជ្ជមានដ៏ធំមួយ គឺបណ្ដាលឱ្យអ្នកខាតពេលវេលា ដល់កិច្ចការផ្ទាល់ខ្លួនជាច្រើន។
២) ប៉ះពាល់ដល់សុខភាពរបស់អ្នក
បណ្ដាញសង្គម Facebook មិនត្រឹមតែជាគេហទំព័រអាចជះផលអវិជ្ជមានចំពោះពេលវេលាផ្ទាល់ខ្លួនរបស់អ្នក និងបំផ្លាញភាពមានទំនាក់ទំនងសង្គមពិតប៉ុណ្ណោះទេ តែក៏អាចប៉ះពាល់ដល់សុខភាពលោកអ្នកទៀតផង។ ការសិក្សាមួយចំនួនឱ្យដឹងថា វាអាចប៉ះពាល់ដល់ប្រព័ន្ធការពាររាងកាយរបស់អ្នក ហើយរារាំងការការលូតលាស់អ័រម៉ូន ធ្វើឱ្យអន់ថយដល់ប្រព័ន្ធរំលាយអាហារ ចក្ខុវិស័យ ការគិតចុះខ្សោយមានដែនកំណត់ និងអាចបំផ្លាញការស្វែងរកគំនិតច្នៃប្រឌិត ហើយក៏ប៉ះពាល់ដល់ទម្លាប់ គេងយឺត ភ្ញាក់ពីគេងជ្រុលពេល ហើយលែងមានសុភមង្គល។
៣) ចំណាយពេលខ្ជះខ្ជាយទៅលើមនុស្សមិនធ្លាប់ស្គាល់ ឬទោះបីរាប់អាន ក៏មិនប្រាកដនៅពេលជួបគ្នា អាចរក្សាទំនាក់ទំនងដដែលដូចនៅលើ Facebook
មនុស្សធំពេញវ័យជាមធ្យម មាន friend ប្រមាណ ៣៣៨ នាក់នៅលើ Facebook ហើយប្រហែលជាមិនបានស្គាល់គ្នាច្រើនជាង ១០% ឬសុទ្ធតែមិនស្គាល់គ្នាផងក៏ថាបាន។ ពួកគេភាគច្រើនទំនងមានការរស់នៅបែបថ្មីផ្សេងៗពីគ្នា ហើយខ្លះមានចំណង់ចំណូលចិត្តថ្មីផ្សេងៗគ្នា បុគ្គលិកលក្ខណៈខុសគ្នា ការទំនួលខុសត្រូវមានផ្សេងៗគ្នា ពោលគឺជីវិតម្នាក់ៗផ្សេងពីគ្នា។ ពួកគេទាំងនោះ អាចពុំមែនជាមនុស្សដែលអ្នកស្គាល់ឡើយ អីចឹងតើខិតខំចំណាយពេលខ្ជះខ្ជាយដើម្បីអ្វី? តើយល់ថាមានប្រយោជន៍អ្វីដែលត្រូវស្គាល់? ហើយប្រសិនបានរាប់អានតាម Facebook តើនៅពេលអ្នកជួបគ្នានៅខាងក្រៅ ពិតជានៅរក្សាទំនាក់ទំនងដូចការជជែកនៅលើ Facebook ទៀតឬទេ?
៤) អាចជាការធុញទ្រាន់ដល់លោកអ្នកព្រោះ Facebook តែងនាំការផ្សាយពាណិជ្ជកម្ម (Advertisements)
នៅពេលអ្នកចង់ទិញទំនិញអ្វីមួយ អ្នកប្រាកដជាត្រូវស្វែងរក (search) ទំនិញនោះដើម្បីផ្ទៀងផ្ទាត់តម្លៃ និងសម្រេចចិត្តទិញ។ ប៉ុន្តែនៅរយៈពេល ៦ខែក្រោយ Facebook នៅតែរំលឹកអ្នកឱ្យទិញពិចារណាលើទំនិញទោះបីអ្នកបានទិញរួចហើយក៏ដោយ។ ជាការពិតណាស់ គេហទំព័រភាគច្រើនប្រើវិធីសាស្ត្រ ដែលជាការ embedded cookies ប៉ុន្តែមានតែ Facebook ទេជាអ្នកបង្ហោះ ads ទាំងនេះ ទៅលើ timeline របស់អ្នក។
៥) មិនប្រាកដថាអ្វីទាំងឡាយដែលអ្នក Post ទៅ Facebook សុទ្ធតែទទួលបានចាប់អារម្មណ៍ និងយកចិត្តទុកនោះឡើយ
មនុស្សតិចតួចណាស់ដែលគេគិតបារម្ភ ខ្វាយខ្វល់ចង់ដឹងថាអ្នកកំពុងធ្វើអ្វី តើកំពុងនៅជាមួយនរណា កំពុងញុំាអ្វី ឬបានទិញឥវ៉ាន់អ្វីខ្លះ ហើយក៏មិនមានច្រើនដែរនូវអ្នកដែលចាំនៅក្បែរអ្នក លើកទឹកចិត្តអ្នកនោះ។ ដូច្នេះវាដូចជាមិនចាំបាច់អ្វីដែលអ្នកត្រូវមាន Friend ច្រើននោះឡើយ ព្រោះថាបើ friend ច្រើនក៏ពិតមែន តើប៉ុន្មាននាក់ដែលគេពិតជាយកចិត្តទុកដាក់ មានការរាប់អានពិតជាមួយអ្នក?
ម្យ៉ាងមនុស្សក៏មានរឿងរ៉ាវស្មុគស្មាញជាច្រើន ប៉ុន្តែចម្លែកត្រង់ថា គេមិនទៅសុំយោបល់ពីអ្នកខាងក្រៅ ដែលជាអ្នកជិតស្និទ្ធបំផុតនៅជុំវិញខ្លួន ដើម្បីរកដំណោះស្រាយទេ តែបែរជាគិតតែបង្ហោះ Status សុំឱ្យ friend ជួយទៅវិញ។ ឬមួយក៏ដើម្បីទាមទារការចាប់អារម្មណ៍?
៦) គណនី Facebook អាចត្រូវបាន hacker លួចយកទៅប្រើ និងលួចយកព័ត៌មានសម្ងាត់
អាចនិយាយបានថា ពាក្យសម្ដីគ្រប់ម៉ាត់នៅលើ Facebook អាចត្រូវបានទម្លាយចេញនៅពេលណាមួយក៏ថាបាន ដោយសារបច្ចុប្បន្នសំបូរទៅដោយ hacker ទុច្ចរិតជាច្រើន។ Hacker អាចមានវិធីសាស្ត្រផ្សេងៗដើម្បីលួចយកគណនី ក៏ដូចជាលួចមកការសន្ទនាទាំងឡាយ ដឹងពីការសម្ងាត់របស់អ្នកខ្ទេចគ្មានសល់។ ដូច្នេះការជជែកគ្នាឱ្យមានសុវត្ថិភាពខ្ពស់ មិនគួរធ្វើឡើងនៅលើប្រព័ន្ធឌីជីថលតាមរយៈបណ្ដាញសង្គមនោះទេ។
គំនិតគួរពិចារណា៖
យ៉ាងណាប្រសិនបើលោកអ្នកចេះបែងចែកពេលវេលាក្នុងការប្រើមិនថាតែ Facebook ឬបណ្ដាញទំនាក់ទំនងសង្គមផ្សេងៗទៀតនោះទេ គឺសុទ្ធតែមានអត្ថប្រយោជន៍របស់វា តែកុំឱ្យប្រើរហូតដល់ថ្នាក់ញៀន ព្រោះវាអាចធ្វើឲ្យប៉ះពាល់ដល់កិច្ចការផ្ទាល់ខ្លួន ក៏ដូចជាមានការប្រែប្រួល មិនសូវមានទំនាក់ទំនងនៅសង្គមពិតទៅវិញ៕
No comments: