សញ្ញា ៦យ៉ាងបញ្ជាក់ថា អ្នកជាមនុស្សជោគជ័យរួចជាស្រេច

         តើអ្នកធ្លាប់មានអារម្មណ៍ថា អ្នកអាចធ្វើអ្វីដែលខ្លួនឯងចង់ធ្វើនៅក្នុងជីវិត ប៉ុន្ដែឧបសគ្គមួយ ចំនួនតែកើតមានដែរឬទេ តើអ្នកធ្លាប់សួរខ្លួនឯងទេថា តើពេលណាអ្នកក្លាយជាបុគ្គល ជោគជ័យ តើអ្នកធ្លាប់ធុញទ្រាន់ចំពោះការរង់ចាំ និងការព្យាយាមអស់ជាច្រើនឆ្នាំ ហើយស្រេក ឃ្លានចំពោះភាពជោគជ័យសម្រាប់ក្ដីស្រមៃរបស់អ្នកដែរឬទេ

ខាងក្រោមនេះជាហេតុផល៦យ៉ាងដែលបញ្ជាក់ថា អ្នកជាបុគ្គលជោគជ័យជាស្រេចហើយ ទោះបីអ្នកមានអារម្មណ៍ថាអ្នក មិនទាន់ជោគជ័យក៏

១. អ្នកមានពេលវេលាគ្រប់គ្រាន់ 

     មនុស្សភាគច្រើនដែលចង់ចាប់ផ្ដើមអាជីវកម្មផ្ទាល់ខ្លួនតែងប្រើលេសយ៉ាងសាមញ្ញថា ពួកគេគ្មានពេលវេលាគ្រប់គ្រាន់ ក្រៅពីការងារប្រចាំថ្ងៃរបស់គេ។ ប្រសិនបើអ្នកគ្មានពេលវេលាគ្រប់គ្រាន់ដើម្បីធ្វើអាជីវកម្ម តើអ្នកមានពេលវេលាដើម្បីធ្វើអ្វីសម្រាប់ធ្វើអ្វីដែលខ្លួនមិនចង់ធ្វើ។ ដូច្នេះទើបអ្នកគ្មានពេលវេលាសម្រាប់ធ្វើអ្វីដែលខ្លួនចង់ធ្វើ។ វាមិនមែនជារឿងលំបាកនោះទេ ក្នុងការលៃលកពេលវេលា១ម៉ោងក្នុងមួយថ្ងៃ ដើម្បីចាប់ធ្វើការងារ ដែលអ្នកស្រលាញ់។ មិនថាអ្នកអាយុប៉ុន្មាននោះទេ អ្នកតែងមានពេលវេលាគ្រប់គ្រាន់ ដើម្បីចាប់ផ្ដើមអាជីវកម្មរបស់អ្នក។ ដូចនេះប្រសិនបើអ្នកមានពេលវេលាសម្រាប់ធ្វើអ្វីដែលខ្លួនស្រលាញ់ហើយ នោះជាសញ្ញាមួយបញ្ជាក់ថា អ្នកជាមនុស្សជោគជ័យ។

២. អ្នកមានសមត្ថភាពក្នុងការគិត និងរៀនសូត្រ

  មនុស្សដែលមានសមត្ថភាពក្នុងការគិត និងរៀនសូត្រអ្វីដែលថ្មីៗបន្ថែមទៀតគឺជាបុគ្គលជោគជ័យមួយរូប។ មានមនុស្សតិចណាស់នៅក្នុងពិភពលោកនេះដែលជាមនុស្សប្រកាន់នូវការគិត និងស្វែងរកការរៀនសូត្រពេញមួយជីវិត។ អ្នកត្រូវបង្កើតទម្លាប់អានសៀវភៅ ពីព្រោះអ្នកដឹកនាំដ៏អស្ចារ្យទាំងអស់សុទ្ធតែជាមនុស្សពូកែអានសៀវភៅ។

៣.អ្នកមិនចាំបាច់មានលុយ

​​​​      ជាការពិតហើយដែលអ្នកត្រូវការលុយ ប៉ុន្ដែការពឹងផ្អែកទាំងស្រុងទៅលើលុយ ដើម្បីទទួលបានភាពជោគជ័យគ្រាន់តែជាលេសមួយ ដែលមិនអាចនាំអ្នកទៅកាន់ទិសដៅបានឡើយ។ មនុស្សភាគច្រើនគ្មានបទពិសោធក្នុងការចាប់ផ្ដើមរកស៊ី ហើយពួកគេតែងរអ៊ូរទាំថា គ្មាននរណាម្នាក់ផ្ដល់លុយឲ្យគេ ដើម្បីចាប់ផ្ដើមរកស៊ីសោះ។ តើមាននរណាទុកចិត្តអ្នក នៅពេលដែលពួកគេមិនឃើញពីការខិតខំប្រឹងប្រែងរបស់អ្នក។ ជាជាងការរង់ចាំរហូតដល់មានលុយច្រើន អ្នកអាចចាប់ផ្ដើមរកស៊ីតូចតាចជាមួយដើមទុនដែលអ្នកមាន ហើយប្រសិនបើអ្នកបរាជ័យ នោះអ្នកក៏មិនបានខាតបង់លុយច្រើនផងដែរ។

៤.​​អ្នកមានធនធាន

       នៅទីនេះសំដៅលើចំណេះដឹង ជំនាញ ក៏ដូចជាទំនាក់ទំនង។ អ្វីទាំងអស់នេះគឺសុទ្ធតែកើតឡើងពីការរៀនសូត្រ។ មនុស្សមួយចំនួនបានបង្កើតលេសថា ពួកគេគ្មានចំណេះដឹង ឬទំនាក់ទំនងគ្រប់គ្រាន់។ អ្នកត្រូវចាំថា អ្នកមិនដឹង មិនស្គាល់អ្វីទាំងអស់នៅពេលអ្នកកើតមក ប៉ុន្ដែអ្នកត្រូវរៀនសូត្រគ្រប់យ៉ាង។ សូមបោះបង់គំនិតកូនក្មេងនេះចោល ហើយចាប់ផ្ដើមចេញទៅពិភពខាងក្រៅដើម្បីជួបមនុស្សម្នា។ អ៊ីនធឺណេតប្រមូលផ្ដុំគ្រប់ព័ត៌មានដែលអ្នកត្រូវការ ហើយប្រសិនបើអ្នកនៅមិនទាន់ច្បាស់ អ្នកអាចរកមគ្គទេសក៍ដើម្បីឲ្យគេណែនាំអ្នក។

៥.អ្នករស់នៅក្នុងសង្គមទំនើបបំផុត

      អ្នករស់នៅក្នុងសង្គមមួយដែលមនុស្សស្ទើរតែទាំងអស់ប្រើប្រាស់អ៊ីនធឺណេត ដែលអាចភ្ជាប់ទៅកាន់ពិភពលោក ហើយអ្នកអាចទទួលបានអ្វីថ្មីៗជារៀងរាល់ថ្ងៃ។ នេះជាចំណុចល្អមួយដែល អ្នកអាចស្វែងរកវិធីសាស្ត្រធ្វើយ៉ាងណាដើម្បីជួយសន្សំសំចៃលុយ និងពេលវេលារបស់អ្នកមនុស្ស។

៦. អ្នកកំពុងអានអត្ថបទនេះ

    ពិតមែនហើយ អ្នកជាមនុស្សជោគជ័យព្រោះអ្នកកំពុងអានអត្ថបទនេះ។ អ្នកបានអានហេតុផលទាំងប្រាំខាងលើដែលបញ្ជាក់ថា អ្នកជាមនុស្សជោគជ័យរួចហើយ ហើយហេតុផលទីប្រាំមួយនេះគឺមានសារៈសំខាន់ដូចគ្នា ព្រោះមនុស្សគ្នាចាំបាច់ត្រូវការកម្លាំងចិត្ត ហើយនៅពេលអ្នកមានកម្លាំងចិត្ត វាអាចជួយអ្នកជម្នះរាល់ឧបសគ្គក្នុងជីវិត៕