អាថ៌កំបាំងជោគជ័យរបស់ Mark Zuckerberg

ខាងក្រោមនេះជាអាថ៌កំបាំងនៃភាពជោគជ័យទាំង ១១របស់លោក Mark Zuckerberg ដែលជាអ្នកបង្កើតបណ្តាញសង្គមដ៏ល្បីល្បាយ Facebook និងជាមហាសេដ្ឋីពិភពលោកវ័យក្មេងមួយរូប (ថ្ងៃខែឆ្នាំកំណើត ឧសភា ១៤ ១៩៨៤) ៖

១. មានក្ដីសុបិន (Having a Dream)

«ចំណង់ជាចំណុចចាប់ផ្ដើមនូវរាល់ភាពជោគជ័យគ្រប់បែបយ៉ាង» - Napoleon Hill

Mark Zuckerberg មិនមែនទទួលបានជោគជ័យដោយប្រើពេលត្រឹមតែពីរបីថ្ងៃនោះទេ ដំណើរឆ្ពោះទៅរកភាពជោគជ័យរបស់គាត់បានចាប់ផ្ដើមឡើងដោយក្ដីសុបិន។ វាជាបំណងប្រាថ្នាមួយដែលគាត់មានឆន្ទៈក្នុងការធ្វើពលីកម្មគ្រប់បែបយ៉ាងដើម្បីវា។ ដូច្នេះប្រសិនបើអ្នកចង់ទទួលបានជោគជ័យ ចង់ក្លាយជាមហាសេដ្ឋី និងល្បីល្បាញដូច Mark Zuckerberg នោះ អ្នកត្រូវតែមានក្តីសុបិនមួយជាកម្មសិទ្ធរបស់អ្នក។ តើអ្នកចង់បានអ្វីខ្លះក្នុងជីវិតនេះ? តើ ៥ ឬ១០ឆ្នាំក្រោយអ្នកចង់ក្លាយជាអ្វី?

២. គិតវែងឆ្ងាយ (Think Big)

Facebook គឺជាគម្រោងតូចមួយ ប៉ុន្ដែក្ដីសុបិនរបស់ Mark Zuckerberg មិនតូចនោះទេ។ មិត្តភក្ដិរបស់គាត់មើលឃើញថា Facebook គ្រាន់តែជាកិច្ចការសាលាប៉ុណ្ណោះ  ប៉ុន្ដែ Mark Zuckerberg មើលឃើញថា Facebook គឺជាគម្រោងសម្រាប់សកលលោកទាំងមូល ដែលវានឹងផ្លាស់ប្ដូរវិធីក្នុងការទំនាក់ទំនងរបស់មនុស្ស និងធ្វើឲ្យមនុស្សកាន់តែជិតស្និទ្ធគ្នា។ បន្ទាប់មកមនុស្សចាប់ផ្ដើមវិភាគលើ Facebook ថា ជាគម្រោងប្រាក់លាន ប៉ុន្ដែ Mark Zuckerberg យល់ឃើញថាជាគម្រោងប្រាក់ពាន់លាន។

៣. ចាប់ផ្ដើមពីតូច (Start Small)

Mark Zuckerberg មានក្ដីស្រមៃដ៏ធំធេង និងទិសដៅដ៏វែងឆ្ងាយ ប៉ុន្ដែគាត់បានចាប់ផ្ដើមដោយសន្សឹមៗ។ ជំនួសឲ្យការខ្ចីប្រាក់ពីធនាគារមកធ្វើដើមទុនរាប់លានដុល្លារ គាត់បានចាប់ផ្ដើមជាមួយប្រាក់ដើមទុនបន្ដិចបន្ដួចដែលគាត់មាន។

៤. ជឿជាក់ចំពោះខ្លួនឯង (Believe in Yourself)

ជំនឿចំពោះខ្លួនឯងជាសេចក្ដីត្រូវការដំបូងគេ សម្រាប់ជម្នះការភ័យខ្លាចទាំងឡាយក្នុងការឈានទៅរកភាពជោគជ័យ  ហើយ Mark Zuckerberg គឺជាមនុស្សម្នាក់ដែលពោរពេញដោយជំនឿជាក់ចំពោះខ្លួនឯង។ អ្នកមិនអាចបង្កើតអាជីវកម្មមួយជោគជ័យដោយផ្ដល់ជំនឿជាក់ ឬការទទួលខុសត្រូវទាំងស្រុងទៅឲ្យមនុស្សណាម្នាក់ ក្រៅពីខ្លួនអ្នកនោះទេ។

៥. ធ្វើតាមចំណង់ (Follow Your Passion)

Mark Zuckerberg គឺជាមនុស្សដែលមានចំណូលចិត្តផ្នែក Programing តាំងពីកុមារភាព ហើយគាត់បានធ្វើតាមចំណង់ចំណូលចិត្តនេះរហូតមក។

៦. ត្រៀមខ្លួនសម្រាប់ការទិតៀន (Be Prepared for Criticism)

Mark Zuckerberg ក៏ដូចជាសហគ្រិនជោគជ័យផ្សេងទៀតដែរ គាត់មិនដែលតក់ស្លុតចំពោះការទិតៀនរិះគន់ផ្សេងៗដែលគាត់ទទួលបាននោះទេ។ ការរិះគន់គឺជាភាពចាំបាច់មួយក្នុងដំណើរឆ្ពោះទៅរកចំណុចកំពូល ដូច្នេះអ្នកត្រូវតែត្រៀមខ្លួនជាស្រេច មិនមែនគ្រាន់តែត្រៀមខ្លួនទទួលវានោះទេ ប៉ុន្ដែត្រូវត្រៀមខ្លួនជម្នះវាផងដែរ។ កុំអនុញ្ញាតការរិះគន់ទាញអ្នកត្រឡប់ក្រោយ ប៉ុន្ដែអ្នកត្រូវប្រើវាជាជណ្ដើរសម្រាប់ឈានទៅរកភាពខ្ពង់ខ្ពស់។

៧. ឧស្សាហ៍ព្យាយាម (Be Diligent)

ភាពជោគជ័យ គឺជាផ្លែផ្កានៃការព្យាយាម។ គ្មាននរណាម្នាក់ឈានដល់ចំណុចកំពូលដោយគ្មានការខិតខំប្រឹងប្រែងឡើយ។ សហគ្រិនជោគជ័យ និងមហាសេដ្ឋីទាំងអស់អាចមកដល់ចំណុចខាងលើបំផុតបានដោយការឧស្សាហ៍ព្យាយាម។ ពួកគេធ្វើកិច្ចការលំបាកទាំងឡាយក្នុងអំឡុងពេលដែលមនុស្សទាំងឡាយកំពុងសម្រាក ដូច្នេះហើយទើបពួកគេទទួលបានជោគជ័យ។

៨. កុំភ័យខ្លាចក្នុងការប្រកួតប្រជែង (Don’t Be Afraid To Compete With The Giants)

Mark Zuckerberg ចង់ឲ្យ Facebook ក្លាយជាស្នូលរបស់អ៊ីនធឺណេត ប៉ុន្ដែគាត់មានឧបសគ្គមួយ នោះគឺក្រុមហ៊ុនយក្ស Google។ តើ Mark ខ្លាច Google ដែរឬទេ? ចម្លើយគឺអត់ទេ។ ភាពក្លាហានមោះមុតគឺបុគ្គលិកលក្ខណៈមួយរបស់សហគ្រិនជោគជ័យ។ ឲ្យតែមានសេចក្ដីក្លាហាន រឿងអ្វីក៏អាចដោះស្រាយបានដែរ។

៩. ផ្តោតអារម្មណ៍ (Be Focused)

«អ្វីដែលខ្ញុំយកចិត្តទុកដាក់នោះគឺបេសកកម្មដែលធ្វើឲ្យពិភពលោកបើកទូលាយ» - Mark Zuckerberg

តើអ្នកដឹងពីហេតុផលដែល Facebook អាចស៊ូនឹង Google ដែរឬទេ? ចម្លើយគឺព្រោះតែ Mark Zuckerberg ផ្ដោតទៅលើតែការបំពេញបេសកកម្មរបស់ Facebook។ ហេតុនេះហើយដែលសហគ្រិនជោគជ័យដូចជាលោក Warren Buffett លោក Bill Gates និង Andrew Carnegie តែងតែសង្កត់ធ្ងន់ទៅលើការយកចិត្តទុកដាក់ជាចាំបាច់។ ការខិតខំប្រឹងប្រែងដោយគ្មានការយកចិត្តទុកដាក់ទទួលបានលទ្ធផលតូចមួយ ការខិតខំប្រឹងប្រែងដោយយកចិត្តទុកដាក់ទទួលបានលទ្ធផលមហាសាល។

១០. សាកល្បង (Learn to Take Risk)

«អ្នកដែលមិនចូលចិត្តប្រថុយប្រថាន គឺជាមនុស្សប្រថុយប្រថាន» - Robert Kiyosaki

គ្មានសហគ្រិនណាទទួលបានជោគជ័យដោយគ្មានការប្រថុយប្រថាននោះឡើយ។ Mark Zuckerberg ក៏ធ្លាប់មានការប្រថុយប្រថានដែរ។ Mark Zuckerberg បោះបង់ចោលមហាវិទ្យាល័យដើម្បីផ្ដោតអារម្មណ៍លើការបង្កើត Facebook នេះគឺជាការប្រថុយមួយ។ ការប្រឈមមុខជាមួយ Google ក៏ជាប្រថុយប្រថានមួយដែរ។ សហគ្រិនគឺជាអ្នកហ៊ានធ្វើការប្រថុយប្រថាន។ ប្រសិនបើគ្មានការហ៊ានប្រថុយ ពិភពលោកនឹងមិនជឿនលឿនឡើយ។

១១. តាមស្អិតចំពោះដំណើរការ (Stick To The Process)

«នៅក្នុងការងាររកស៊ី ដំណើរការមានភាពសំខាន់ជាងគោលដៅ។ នៅពេលអ្នកចាប់ផ្ដើមបង្កើតអាជីវកម្មមួយ អ្នកកំពុងតែបោះជំហានធ្វើដំណើរ។ ដំណើរការនេះមានការចាប់ផ្ដើម និងបញ្ចប់ ហើយនៅចន្លោះពេលចាប់ផ្ដើម និងបញ្ចប់នឹងមានឧបសគ្គជាច្រើន។ អ្នកនឹងឈ្នះ ប្រសិនបើអ្នកអាចយកឈ្នះលើឧបសគ្គទាំងនោះបាន»។

ការចាប់ផ្ដើមបើកដំណើរការសហគ្រាសគឺជាចំណុចមួយ។ ដានតាមដំណើរការនេះគឺជាចំណុចមួយទៀត។  Facebook មិនមែនជោគជ័យដោយប្រើពេលមួយថ្ងៃពីរថ្ងៃ ឬមួយខែពីរខែឡើយ ហើយ Mark Zuckerberg ក៏មិនមែនក្លាយជាមហាសេដ្ឋីមួយឆ្នាំពីរនោះដែរ គាត់ចំណាយពេលជាច្រើនឆ្នាំធ្វើវា ហើយឥឡូវក៏នៅតែចំណាយពេលលើវា។ នេះជាឈាមជ័ររបស់សហគ្រិន។

សរុបមក ភាពជោគជ័យរបស់ Mark Zuckerberg  មិនមែនកើតឡើយដោយចៃដន្យ ឬក៏សំណាងពីព្រេងនាយឡើយ។ គាត់ក្លាយជាមហាសេដ្ឋីពិភពលោកវ័យក្មេង ព្រោះតែក្ដីស្រមៃ ការរៀបចំគម្រោង និងដំណើរការរបស់គាត់៕