Larry Page ដឹកនាំ Google ពីដើមទុន ១លានដុល្លារទៅជាក្រុមហ៊ុនមានប្រាក់រាប់ពាន់លានដុល្លារ ប្រវត្តិរូបសង្ខេប
ដំណើរផ្ដួចផ្ដើមមុនការបង្កើតក្រុមហ៊ុន Google
នៅវ័យ២៤ឆ្នាំ លោក Page បានសម្រេចចិត្តធ្វើការរយៈពេលពីរបីឆ្នាំក្នុងវិស័យឧស្សាហកម្មបច្ចេកវិទ្យា មុននឹងបន្តការសិក្សាផ្នែកបណ្ឌិតវិទ្យាសាស្ត្រកុំព្យូទ័រនៅសាកលវិទ្យាល័យ Stanford។ នៅទីនេះហើយដែលលោកបានជួប Sergey Brin។
និស្សិតទាំងពីររូបនេះបានសហការគ្នា និងលើកគម្រោងបង្កើតគេហទំព័រមួយដែលអាចឲ្យសាធារណជននៅជុំវិញពិភពលោកចូលស្វែងរកឯកសារ ឬ ព័ត៌មានផ្សេងៗដែលគេចង់បានដោយភ្ជាប់ទៅនឹងគេហទំព័រផ្សេងទៀត។ សម្រាប់ Larry Page ដែលបានបង្កើតគេហទំព័រមួយរបស់ខ្លួនស្រាប់ ពីមុនមកមានឈ្មោះថា BackRub បានសហការជាមួយ Brin នៅក្នុងឆ្នាំ១៩៩៦ ប្តូរមកជាគេហទំព័រ PageRank យកតាមឈ្មោះរបស់ Larry Page នេះ។
បន្ទាប់មកនិស្សិតទាំងពីរូបនេះបានសាកល្បងធ្វើតេស្តគេហទំព័ររបស់ខ្លួននៅសាកលវិទ្យាល័យ Stanford។ ស្ថាបនិករួមរបស់គេហទំព័រមួយនេះ បានរក្សទុកគេហទំព័ររបស់ខ្លួននៅជាលក្ខណៈសាមញ្ញមួយដោយ គ្មាន Web Developer ទន្ទឹមនឹងការស្វែងរកគន្លឹះថ្មីៗបន្ថែមទៀតធ្វើឲ្យគោលដៅរបស់ពួកគេទទួលបានជោគជ័យ។
ការបង្កើតក្រុមហ៊ុន Google
បន្ទាប់ពីមានជំនាញគ្រប់គ្រាន់លើប្រព័ន្ធបច្ចេកវិទ្យា Page និង Brin បានសម្រេចចិត្តដូរឈ្មោះក្រុមហ៊ុនចាស់មកជា Google.com វិញដែលបានដំណើរការជាផ្លូវការនៅខែកញ្ញា ឆ្នាំ១៩៩៨ ក្នុងដើមទុនត្រឹមតែ ១លានដុល្លារប៉ុណ្ណោះដែល សហស្ថាបនិកទាំងពីរនាក់ទទួលបានប្រាក់កម្ចីពីគ្រួសារ មិត្តភក្ដិ និង អ្នកវិនិយោគមួយចំនួនទៀត។
អ្វីៗបានដំណើរការល្អប្រសើរជាបន្តបន្ទាប់ រហូតដល់ឆ្នាំ២០០៤ ក្រុមហ៊ុន Google បានត្រូវទទួលស្គាល់ជាផ្លូវការ និងមានប្រជាប្រិយភាពកាន់តែធំឡើងរហូតអាចរកប្រាក់ចំណូលបាន១,៦៧ពាន់លានដុល្លារ។ មកដល់ចុងខែ មិថុនា ឆ្នាំ២០០៨ ស្រាប់តែក្រុមហ៊ុនអ៊ីនធឺណិតយក្សមួយនេះ ប្រកាសថា ខ្លួនបានរកប្រាក់ចំណូលបន្ថែមទៀតរហូតដល់ ៥,៣៧ ពាន់លានដុល្លារ ពោលគឺបានកើនឡើង ៣៩% បើប្រៀបទៅនឹងត្រីមាសទី២នៅក្នុងឆ្នាំ២០០៧។
កាន់តែភ្ញាក់ផ្អើលជាងនេះ ជាមួយនឹងមានចំនួនអ្នកប្រើ ៥,៩ពាន់លាននាក់ក្នុងមួយថ្ងៃ ក្នុងឆ្នាំ២០១៣ កន្លងទៅនេះ Google អាចរកប្រាក់ចំណូលបាន ១៦, ៧៥ពាន់លានដុល្លារ ដែលនេះបានធ្វើឲ្យលោក Page ជាប់ចំណាត់ថ្នាក់ជាមហាសេដ្ឋីមានបំផុតលំដាប់លេខរៀងទី១៣ របស់អាមេរិក តាមរយៈទស្សនាវដី្ត Forbes។
នៅពេលបច្ចុប្បន្ននេះ ក្នុងនាមជា CEO ដឹកនាំក្រុមហ៊ុនលំដាប់ពិភពលោកមួយនេះ លោក Page មានទំនួលខុសត្រូវលើកិច្ចការទូទៅរបស់ក្រុមហ៊ុន ជាមួយស្ថាបនិករួមរបស់លោកគឺ លោក Brin ដែលជានាយកគ្រប់គ្រងគម្រោងពិសេសរបស់ក្រុមហ៊ុន Google ខណៈដែលលោក Eric Schmidt មានមុខងារជានាយកប្រតិបត្តិ(Executive Chairman)។
ភាពជោគជ័យរបស់លោក Page នឹងអាចជាផ្លូវមួយត្រួសត្រាយប្រិយមិត្ត ជាពិសេសសហគ្រិនទាំងអស់ដែលចង់បើកអាជីវកម្ម ឬ មុខជំនួញរបស់ខ្លួនដោយជោគជ័យ។ ខាងក្រោមនេះ ជាដំបូន្មានល្អៗសំខាន់ៗចំនួន ៥ របស់លោក Page សម្រាប់មិត្តអ្នកអានស្វែងយល់៖
១) ប្រើប្រាស់យុទ្ធសាស្ត្រវាយលុកទីផ្សារយ៉ាងមានប្រសិទ្ធភាព
សម្រាប់លោក Page បច្ចេកវិទ្យាតែមួយមុខ មិនអាចធ្វើ Google ជោគជ័យបានទេ តែគន្លឹះបង្កើតយុទ្ធសាស្ត្រដ៏មានប្រសិទ្ធភាពមួយចូលវាយលុកក្នុងទីផ្សារពិតជាអាច។ ក្នុងមួយឆ្នាំៗ Google បានរកប្រាក់ចំណូលយ៉ាងច្រើនសន្ធឹកសន្ធាប់ពីកម្មវិធីផ្សព្វផ្សាយពាណិជ្ជកម្មនានាដែលគ្មានក្រុមហ៊ុនណាមួយធ្វើបានពីមុនមក។
២) កុំផ្ដោតលើដៃគូប្រកួតប្រជែងហួសហេតុពេក
ការលើកទឹកចិត្តសម្រាប់ខ្លួនឯង ទោះបីជាពេលខ្លះដឹងថា ក្រុមហ៊ុនដទៃខ្លាំងជាងអ្នកគឺជាអ្វីដែលសហគ្រិនគ្រប់រូបត្រូវប្រកាន់ខ្ជាប់។ នេះ ជាការលើកឡើងរបស់លោក Page។ អ្នកមិនត្រូវលើកតម្កើងសមត្ថភាពក្រុមហ៊ុនណាមួយឲ្យហួសពីសមត្ថភាពក្រុមហ៊ុនរបស់អ្នកនោះឡើយ។ ការផ្ដោតលើគោលដៅរបស់អ្នក ហើយព្យាយាមរកគន្លឹះឬ យុទ្ធសាស្ត្រមួយខុសប្លែកពីគេ ដែលក្រុមហ៊ុននោះគ្មាន នឹងអាចធ្វើឲ្យអ្នកឈរនៅមុខគេបាន។
៣) យកអ្នកចេះធ្វើជាដៃគូអាជីវកម្ម
Eric Schmidt និង Sergey Brin គឺជាបុគ្គលសំខាន់ឆ្វេងស្តាំរបស់លោក Page ដែលធ្វើឲ្យគាត់បានទទួលជោគជ័យនៅថ្ងៃនេះ។ CEO របស់ ក្រុមហ៊ុន Google ម្នាក់នេះបាននិយាយថា បើចង់ជោគជ័យមែននោះ សហគ្រិនគ្រប់រូបត្រូវមានទំនាក់ទំនង ឬ ធ្វើកាជាមួយបុគ្គលមានចំណេះដឹង ឬ ជំនាញច្បាស់លាស់ក្នុងកិច្ចការអាជីវកម្ម ត្បិតអីបុគ្គលប្រភេទនេះនឹងធ្វើជួយបណ្តុះបណ្តាលឲ្យអ្នកកាន់តែរីកចម្រើនឡើង។
៤) ចង់បើកអាជីវកម្មទាល់តែមានមហិច្ឆតាធំ
លោក Larry Page ជាមនុស្សមានទស្សនវិស័យយូរអង្វែង និង មានមហិច្ឆតាខ្ពស់សម្រាប់ពង្រីកក្រុមហ៊ុនរបស់លោកឲ្យកាន់តែបោះជំហានពីមួយថ្ងៃទៅមួយថ្ងៃ។ លោកបានលើកឡើងថា មិនចំពោះថា ប្រធានក្រុមហ៊ុនជាអ្នកណានោះទេ តែការផ្តល់សង្ឃឹម និង ការបង្កើតមហិច្ឆតាសម្រាប់ខ្លួនឯង និងក្រុមហ៊ុនទាំងមូលថា ចង់បានអ្វីនៅពេលខាងមុខ គឺជារឿងចាំបាច់។
៥) ភាពជឿជាក់
លោក Larry ត្រូវបានគេចាត់ទុកថា ជាបុគ្គលមានយុទ្ធសាស្ត្រមុតស្រួចបំផុតរបស់ក្រុមហ៊ុនមួយនេះ សម្រាប់អនុវត្តទិសដៅ និង ការសម្រេចចិត្តផ្សេងៗនៅក្នុងក្រុមហ៊ុន។ ទំនុកចិត្ត និងភាពជឿជាក់របស់លោក បានធ្វើឲ្យមហាសេដ្ឋីម្នាក់បំពេញការងារដោយជោគជ័យបំផុតក្រោមការសហការគ្នាយ៉ាងស៊ីចង្វាក់ជាមួយស្ថាបនិករួមរបស់គាត់ លោក Sergey Brin ។
៦) ក្រុមហ៊ុនអ្នកអាចក្លាយជាក្រុមហ៊ុនធំជាង Google
នេះពិតជាការលើកទឹកចិត្តដ៏ធំមួយរបស់លោក Page ទៅដល់សហគ្រិននានានៅជុំវិញពិភពលោក។ លោកបាននិយាយថា Google គ្រាន់តែជាក្រុមហ៊ុនដ៏តូចមួយប៉ុណ្ណោះ អាចរកឃើញយុទ្ធសាស្ត្រធ្វើអាជីវកម្មនៅក្នុងសម័យបច្ចេកវិទ្យាយើងនេះ។ នេះមានន័យថា នៅមានយុទ្ធសាស្ត្របង្កើតមុខជំនួញ រាប់លានប្រភេទផ្សេងទៀតកំពុងលាក់ខ្លួននៅភពផែនដីនៅពេលបច្ចុប្បន្ន ហើយកំពុងរង់ចាំសហគ្រិនដែលមានសមត្ថភាពទៅជីកកកាយវាឡើង៕
No comments: