ហេតុផល ៥ យ៉ាងបញ្ជាក់ថា ហេតុអ្វីអ្នកចូលចិត្តអានសៀវភៅមានឱកាសជោគជ័យជាងអ្នកមិនចូលចិត្តអានសៀវភៅ?
+ អ្នកជោគជ័យ គឺជាមនុស្សដែលមានសមត្ថភាពក្នុងការធ្វើកិច្ចការអ្វីមួយ តាមការយល់ឃើញរបស់ខ្លួន។ ទន្ទឹមនឹងនេះដែរ អ្នកជោគជ័យក៏ត្រូវតែជាមនុស្សដែលចូលចិត្តអានសៀវភៅផងដែរ ព្រោះការអានសៀវភៅផ្តល់ចំណេះដឹងជាច្រើន ដែលមានប្រយោជន៍សម្រាប់អនុវត្តន៍ក្នុងជីវិតរស់នៅជាក់ស្តែង។
ខាងក្រោមនេះ គឺជាហេតុផលចំនួន៥យ៉ាង ដែលបញ្ជាក់ថា អ្នកចូលចិត្តអានសៀវភៅគឺមានឱកាសជោគជ័យច្រើនក្នុង ជីវិត៖១) មានជំនាញក្នុងការផ្ដោតអារម្មណ៍
ក្នុង ការអានសៀវភៅមិនមែនជារឿងងាយស្រួលនោះទេ ព្រោះបើមិនយកចិត្តទុកដាក់ ឬ មិនចេះផ្ដោតអារម្មណ៍ទេ ប្រាកដជាមិនអាចអានសៀវភៅចប់ចុងចប់ដើមនោះឡើយ។ មានន័យថា អ្នកដែលចូលចិត្តអានសៀវភៅ គឺជាមនុស្សដែលពូកែផ្ដោតអារម្មណ៍ខ្ពស់ ដូច្នេះកាលណា មនុស្សពូកែចំណុចនេះ វាធ្វើឲ្យពួកគេអាចធ្វើអ្វីៗប្រកបដោយប្រសិទ្ធភាព អាចក្តោបព័ត៌មានបានច្រើននូវអ្វីដែលខ្លួនអាន។
២) ពូកែបង្កើតគោលដៅ
អ្នកដែលចូលចិត្តអាន សៀវភៅ សុទ្ធតែមានគោលដៅច្បាស់លាស់ ព្រោះសៀវភៅមានច្រើនណាស់ ប្រសិនបើគ្មានផែនការ និង គោលដៅច្បាស់លាស់ក្នុងការទទួលបានអ្វីមួយពីការអានទេ ប្រហែលជាមិនអាចអានដើម្បីជាប្រយោជន៍នោះឡើយ។ ដូច្នេះ អ្នកដែលចូលចិត្តអានសៀវភៅ ប្រាកដជាពូកែក្នុងការបង្កើតគោលដៅ។ កាលណាអ្នកមានគោលដៅច្បាស់លាស់ក្នុងការធ្វើអ្វីមួយ អ្នកប្រាកដជាអ្នកសម្រេចតាមក្តីប្រាថ្នាមិនខាន។
៣) ចេះប្រើពេលឲ្យមានប្រយោជន៍
សម្រាប់អ្នក ដែលចូលចិត្តអានសៀវភៅ ពួកគេមិនទុកឲ្យពេលវេលាឲ្យទំនេរចោលឥតប្រយោជន៍នោះទេ ពោលគឺ តែងតែរកអ្វីដែលថ្មី និង មានប្រយោជន៍សម្រាប់ខ្លួនតាមរយៈការអាន។ ដូច្នេះហើយ អ្នកដែលជោគជ័យ គឺជាមនុស្សដែលចេះប្រើពេលវេលាយ៉ាងមានប្រយោជន៍បំផុត ក្នុងការធ្វើកិច្ចការផ្សេងៗ សម្រាប់ការរស់នៅរបស់ខ្លួន។
៤) មានការគិតរហ័សរហួន
ដូចដែលបានដឹងហើយថា ការអានសៀវភៅ ពិតជាមានប្រយោជន៍យ៉ាងខ្លាំងសម្រាប់ជីវិតរបស់មនុស្សម្នាក់ៗ ព្រោះថា មនុស្សអាចទទួលបានចំណេះដឹងជាច្រើនប្រភេទ។ ការដឹងព័ត៌មានច្រើននោះហើយ ធ្វើឲ្យអ្នកមានការគិតទូលាយ និង មានភាពរហ័សរហួនបំផុត ដើម្បីឆ្លើយតបទៅនឹងស្ថានការណ៍ពិតជាក់ស្តែង។
៥) មានការចងចាំល្អ
ជាទូទៅ អ្នកដែលចូលចិត្តអានសៀវភៅតែងតែមានការចងចាំល្អ ព្រោះថា ខួរក្បាលរបស់ពួកគេតែងហ្វឹកហាត់ជារៀងរាល់ថ្ងៃជាមួយនឹងព័ត៌មាន និង ចំណេះដឹងជាច្រើនតាមរយៈការអាន។ បើធៀបនឹងអ្នកដែលមិនចូលចិត្តអានសៀវភៅ ខួរក្បាលរបស់អ្នកចូលចិត្តអាន គឺពូកែចងចាំជាង។ កាលណាខួរក្បាលមានការចងចាំល្អ វាក៏ជាផ្នែកមួយដ៏សំខាន់ក្នុងការជួយឲ្យមនុស្សមានភាពជោគជ័យផង ដែរ៕
No comments: